l'aurelha sensa òbras, mòrta es

Divendres que ven anarai au concert das Brassens Not's Dead. Son nombroses los que dison qu'es de merda e que te chaplan lo paure «tonton Georges». Ieu vos dise que los fau pas escotar an aqueles. Demòre a 50 metras de l'ostau natalenc de B. Aquò vos fa una bèla gamba, non?? Rai, (coma diriá lou capoulièr de la fila d'anchoio), ont ne siáu?

Tot aquò per vos dire «chers lecteurs» que l'autre jorn ère a cosinar la granda especialitat Setòria das fins de meses que començan lo 10 es a dire «lepatàlaiga», ou en version zupìena «lepatares». Se coneissètz pas la recepta daissatz un comentari sus aqueu blòg, siáu segur l'autor fará un article sus aquela especialitat dau trepador «setoy». Coma ère sol, metère la musica un pauc forteta. Cantave coma un falord «les imbeciles heureux qui sont nés quelque part».Quora l'aiga de la caçairòla se metèt a vessar. Levère lèu-lèu, lo «sant graal» de la gastronomia, de l'agaza pel pausat,,, mai ont? I aviá pas cap de plaça dins la cosina. Au cap d'un chifratge long dau temps que te fau per te brutlar la man causiguère de la metre pel sòu.

Quant tornère per barar l'agaza que vegère a l'entorn dau fogal... d'aiga. Mai l'aiga espandida aquí sus la cosinièra dessenhava lo retrach de Brassens. Se me cresètz pas, me creiretz quant vos dirai que mema la santa pipa èra apareguda.

Per clavar:

1) Escotar de Brassens not's dead en fasent la coisina te far tornar viure lo Georges.

2) Alara merda als mauparlants e sachètz que Bransens not's dead!!

Brassen's not dead à Sete
envoyé par ahoraqui. -

Smoke screen

Coneissètz la tecnica dau "smoke screen"? Pòt semblar a la d'un "toreador" que se servís de sa capa per amagar la sieuna espasa e aitau de melhor plantar lo tòro. E ben nautres estudiants marcham coma aquò. Sota la crida de l'unef un fum d'estudiants se son acampar per exigir lo retorn das bon vièlhs ragantatges. Per los que sont pas a l'universitat clapassenca "Pauc Val" vos vau explicar. An remplaçat los ragantatges per un autre sistem dich de la "segonda chança"... a la gròssa tot lo mond pòt tornar passar sos exams e causir la melhora nòta entre las doas sesilhas. Lo problemàs èra que l'estudiant podiá pas coneisser las sieunas nòtas abans aquela segonda sesilha. Alara mobilisacion de las grandarassas, bandairòlas, crits, cants... òu! Quin vam revolucionari!! Fin finala an capitat (o puslèu o vòlon creire). Los estudiants auràn drech de saupre las lors nòtas avans de passar "la segonda chança"...
S'avètz capitat de me legir fins ara anatz comprene per de que vos parlave de "smoke screen". L'estudiant sindicat o amic de l'unef crei qu'a ben resistit contra aquela fac que reprodusís las inegalitats socialas e que gràcia a la sieuna granda victòria de la "segonda chança" sos confraires van profiechar avançada sociala de las grandas. Mai sap pas que la sieuna universitat se far colaborairitz de la politica en terma d'immigracion dau govèrn. En efièch per qu'un estudiant estrangièr posque aver son permés de sejorn, deu balhar un certificat d'escolaritat a la "pòrcfectura"*. Mai per l'aver, aquel certificat, li fau mostrar son permés de sejorn lo jorn de son inscripcion.... Doncas lo tip es condemnat a un vira vai t'en permanent entra las diferentas administracions, un ceucle viciós qué! Aquí i a ben quicòm que truca. L'universitat es tenguda per pas cap de lei per far aquò. A lo drech e lo dever de verificar l'identitat de lo que ven s'incriure, mai pas lo d'exigir sa "regularitat" per l'inscriure...
E quand sabèm totes los problèmas de los que son pas "regularizats" (que m'enràbia aquel mot, coma se l'èsser uman poiriá èstre regularisat...), es a dire impossibilitat d'accès a la caf,la seguritat sociala, de far denóncia en cas d'agression, la paur das contraròtlas de polícia e mai l'incapacitat psicologic a se posque fargar de projèctes dins l'avenidor (e òc quant te pòs faire escampar d'un jorn a l'autre... enfin m'as compres)....E ben se vos dise, qu' ai ben enveja de li racar dessuta an aquela fac, es sonque per que tene de mon bachilierat en Scienças Economicas lo don de l'autocensura.
Tant que vira fai de torns an ganhat la lor batesta (l'unef), e avèm de polits locaus per se segar associativament. Me l'as totjorn dich Melà "julien siás un brandaire"

*cf: l'Agaza de V.Gelu

qu'un tron de dieu lo cure!!!

Les Olivensteins son un grop de punk francés de Roan formats en 1978. Au despiòch d'una carrièra de las cortas, marquèron l'istòria amb un 45 torns de 3 titras (Fier de ne rien faire, Euthanasie, Je suis négatif.) . Son nom ven dau psicanalista Claude Olievenstein (que se trachava das problèmas das toxicomans). Trapant pas cap de labèl, subissent de pression das Entresenhas Generalas e dau mètge Olievenstein, que faguèt anullar un de lors concert a Paris, lo grop decidís de se separar en genièr de 1980.

Podetz trapar lor disca en descargament sus aquesta site

Qual es aquel?

Un jorn aurai las meteissas mostachas qu'el... un jorn

l'aiga a la pila

Per començar aqueste blòg, vos voliáu faire un compta rendut de la caminada que se debanèt au Ventorn. Aviáu tot preparat : aparelh fotò, quasernet de quasi de jornalista e mai un credon amb "l'aponcha a credon". Dins l'aparelh li aviá ges de pilas, dins la mala de la veitura la mieuna saca es demorada la dimenjada tota. Lo quasernet, lo credon e son "aponchador" èran dins la saca. Fin finala vos ne parlarai pas estant que vos trufatz ben de la mieuna vida privada... (se ne volètz ne saupre mai, podètz participar a la soscripcion pel Dvd de la caminada).